GESTIÓN CULTURAL Y 'MARCA ASTURIAS'. UN ARTÍCULO DE ADOLFO CAMILO DÍAZ

Pepe, Higinio, Mael... y los demás

DOLFO CAMILO

Ún de los más guapos cantares d’Amaral (‘Marta, Sebas, Guille y los demás’) valnos p’acordanos d’un colectivu profesional qu’aveza tar en zona de sombra, dando lluz a aquellos o aquelles que de verdá lo merecen: creadores y… espectadores. Falo, cómo non, de los ‘xestores culturales’, cuantayá reconocibles como ‘animadores’, depués como ‘técnicos’ y, d’un tiempu a esta parte, como ‘programadores’.

La inesistencia d’una denominación única y formal pa estos profesionales evidencia la indefinición d’ unos perfiles llaborales que tovía nun sabemos bien si vienen de los pregoneros del renacimientu (y entós, ún de los sos santos de referencia sedría San Lázaro de Tormes, qu’asina acabó los sos díes) o, buscando referencies anteriores, de los mesmos bufones medievales, eso sí, pasando pelos maestros de ceremonies victorianos, los buhoneros… y en xeneral toa persona que llevare información y entretenimientu, ensi él mesmu ser l’artista, d’un llau pa otru. Vengan d’onde vengan… el casu ye qu’esisten y que son parte fundamental d’eso que llamamos ‘Marca Asturies’ o ‘Marca España’. Y esa esistencia ye tan evidente que, nun país como Asturies, con poca ufierta cultural privada (háiles heroiques como El Huerto de Xixón… Y háiles pirates, como esa fundación tontilloca a la que-y dio por vender el Goya que teníen pa facer caxa!), la ufierta pública qu’esiste (del megaconciertu nun estadiu al cursín de Pathcwork) xestiónenla esos innominaos profesionales, la mayor parte de les veces de bona y digna manera.

Tornemos al títulu: Pepe ye José Paz, que fue ún de los meyores, más eficaces y más discretos xestores de lo cultural llevando la Casa de Cultura de Llanera (realmente, les cases de cultura de Llanera, ún de los conceyos con más y meyores infrastructures d’Asturies. Pepa acaba xubilase: dexa un conceyu, culturalmente armáu, ricu, participativu… Y el so alma tá ehí: de les biblioteques a la Escuela Música; de los milenta talleres a les milenta actividaes teatrales, musicales, artístiques… Si dos palabres definen a una persona, les de Pepe Paz sedríen ‘efectividá’ y ‘humildá’… Palabres concidentes con otru de los grandes, xubiláu poco enantes de que toos pandemiáremos: Higinio del Río, que foi’l xestor cultural que punxo a Llanes nos más reconocibles mapes de la excelencia cultural. ¿Y Mael? Mael ye Ismael González Arias, hiperactivu y illustráu y caudalosu factótum de la cultura en Mieres… Pepe, Higinio y Mael son parte d’una profesión, insisto, poco conocida y poco reconocida porque d’ella, qu’afecta a miles de profesionales y a cientos de miles d’espectadores, namás que sabemos polos resultaos, non polos procesos. Vemos un Festival Infantil, por dir a dalgo aparentemente trivial, y nunca nun valoramos, el tiempu, l’esfuerzu, la dedicación d’esos profesionales pa qu’esi festival llegue dignu y prestosu a los espectadores… Pa qu’esi actu sía inolvidable pa los executantes.

Y con Pepe, Higinio y Mael cómo nun falar d’esi pozu de sabencia que ye Jaime Luis en Castrillón, o d’esi tresuntu de Balzac inagotable que ye Alain Fernández en Carreño o d’esa impecable Julia Rodríguez n’Avilés, o d’esi imparable Manuel del Rivero en Colunga, o d’esos maraviellosos estajanovistes Julia Martín, Carmen Cabanas o Toño Criado en Xixón… Compañeros y compañeres, ente más otros, que tienen apurrío tantu llabor, tantu talentu y tanta estima a eso que sigue, seguimos siendo, el respetable. 

(Artículo publicado en el diario EL COMERCIO el sábado 23 de octubre de 2021). 

Adolfo Camilo Díaz, gerente del Patronato de Cultura del Ayuntamiento de Corvera. (Foto: H. del Río).